قصة البشرية " التحولات النوعية " / الحلقة 5 .

مع انتهاء العصر البرونزى " صهر النحاس مع القصدير " واللى بيتم التأريخ له بهجوم شعوب البحر المتوسط على الامبراطورية المصرية كان العالم بيستعد لنقله نوعية جديدة , طبعا مصر قدرت تصد الهجوم لكن ده كان بداية منحنى تنازلى لسقوط الامبراطورية المصرية تحت سيطرة فارس ..

نقص الموارد Resources لصناعة البرونز كان عامل ضغط للبحث عن مورد جديد وبالفعل تم اكتشاف الحديد خاصة أنه أكثر صلابه وبدأت تصعد امبراطوريات جديدة وجيوش أكثر كفاءة وتطورت صناعات عديدة أيضا ..

يهمنا هنا الاشارة للعوامل المادية اللى صنعت التطور ووفرت المناخ اللازم لظهور الحضارة فى مناطق دون غيرها , فمثلا الحديد موجود بكثافة فى اليونان وده وفر امكانية ظهور حضارة المدن اليونانية وعلى رأسها أسبرطة باعتبارها مدينة عسكرية وبيدخل الشاب بعد وصوله 18 سنة للجيش الأسبرطى , لكن باضافة عوامل أخرى ايضا لقيام الحضارة زى النشاط التجارى فى أثينا بالاضافة لتمايز أثينا فى الانتاج الثقافى فى الفلسفة وفن المسرح الخ

كان فيه فرصة لنشوء فكرة الديمقراطية أو حرية الاختيار وان كانت مقيدة فى الذكور الاحرار , لكن هنا حجم المدينة وقلة عدد سكانها واشتغال اغلبهم بالتجارة بيوفر امكانية نشوء نظام سياسى مماثل , وبرغم ذلك لم تشهد كل المدن اليونانية نفس التجربة فما بالنا بالشرق القديم وهو اللى عرف امبراطوريات بمساحات شاسعة وسلطة حكومة مركزية كبيرة ذات اله مركزى متمثل فى الملك ..

هنا فكرة الديمقراطية جدلية بين واقع مادى ونشاط السكان اللى ممكن يوفر امكانية لتطور تصور أولى عن الديمقراطية ..

فى حين اليونان نفسها لن تستمر طويلا حتى تخضع لسلطة فيليب المقدونى وابنه الاسكندر وتبدأ تتحول لأمبراطورية مترامية الاطراف ومن هنا فجذور الاستبداد عميقة جدا فى التاريخ البشرى وهى دايما مرتبطه باشكالية الصراع على الموارد النادرة ومسألة توزيعها وبالتالى التمايز الطبقى الحاصل واللى بيدفع الواقع الى طريق الاستبداد خاصة لو تضخمت الدولة وزاد عدد رعاياها , وحتى الأن الديمقراطية الحديثة توفر مساحة ضيقة للمشاركة فى اتخاذ القرار لانه جماعات المصالح هى اللى بتتحكم فى الغالب فى اختيار وتوجيه سياسات الدولة وتقرير ما يلزم اتباعه من سياسات وبيسمح بمساحة للحرية فى اطار الفائض المتوفر واللى ممكن بيه السماح بمساحة أكبر من دول أخرى لديها مشاكل فى التنمية وتراث من الفشل المستمر ...