قصة البشرية " التحولات النوعية " / الحلقة 2 .

على حسب التقديرات فالبحث عن السلف المشترك بيتكلم فى حوالى 8 مليون سنة , أما بقايا هيكل عظمى قريب للانسان زى لوسى عمره 3 مليون سنة أما آردي فعمره 4 مليون سنة ومازال العلماء شغالين على السلف المشترك ..

لكن الانسان الحديث تاريخه مليون سنة وهو الانسان اللى تحررت ايديه وبيمشى على رجليه فقط وبدأ يتمايز عن القردة العليا وينعزل عنهم جينيا وده خد وقت طويل جدا على مدار ملايين السنين من السلف المشترك وحتى مليون سنة , بعد كده بناخد فى الرحلة دى لحد من 70 الف سنة والعصر الجليدى خاصة فى الشمال بعد هجرة الانسان الصياد من افريقيا الى بقية العالم وهنا بيظهر انسان الكهف اللى بيسجل وجوده بعلامات على الكهوف مازالت موجودة تخلد ذكراه حتى الأن ..

من هنا عرفت معلومات جديدة الحقيقة فى مناقشة مع الدكتور معمر نصار , فمثلا فيما يخص ظهور الانسان الأبيض , فده طبيعى بمعنى انه لو أفريقى ممكن يظهر فى وسط ابناءه طفل لونه ابيض وبشرته بيضاء وعشان كده بعض الديانات القديمة واللى مازالت موجودة عند القبائل الأفريقية سجلت فكرة الاله الأبيض واعتبروا نفسهم بعد الكشوف الجغرافية لما قابلوا الأوربيين مرة اخرى انهم اجداد هذا الجنس الأبيض , فالبيئة فى أوربا انتخبت اللون الأبيض وبالتالى بدأ اللون الأسود ينحصر فى أفريقيا رغم ان جذورنا كلها أفريقية ..

وكمثال على ذلك فيه مثلا النمر الأبيض وهو نوع نادر وهو نتاج عادى لتزاوج نمور بألوان طبيعية وهى الالوان اللى ارتبطت بالبيئة عشان البقاء , وفى الغالب بيحصل انه القطيع بيقتل العناصر المختلفة الا اذا استطاعت ان تنعزل جغرافيا فى نفس المكان او تنعزل بعيدا وتبدأ تتكاثر وخاصة لو كان هناك ظروف بيئية تساعد على تكاثرها , بمعنى انه لو نمر أبيض فى برارى أفريقيا ف فرصته فى البقاء ضعيفة لانه هيبقى مكشوف جدا وهتبقى احتمالات حصوله على غذائه أقل ..

مثال اخر خاص بالذئاب وهى كانت منتشرة فى أوربا بشكل خاص , هنلاقى انه مجموعة منها بدأت تبقى ودودة أكثر مع البشر ومبتخفش منهم وممكن تاكل فضلاتهم وبالطبع مقدرتش تعيش مع قطيع الذئاب فانعزلت عنه ولكن وجود البشر وفرلها حاضنه للتكاثر وده دور البشر ومساهمتهم فى الانتخاب الطبيعى , وبالتالى ظهرت انواع متعددة من الكلاب لانه البيئة سمحت بهذا التنوع طالما مصدر الغذاء متوفر ومفيش ضغط بالتزام لون معين ..

معلومة اضافية / انه مرض السكرى الشهير هو مرض البيض بالاساس لانه كان نتاج تزاوج مع النياندرتال واللى كان عنده المرض ده , وبالتالى الانسان الأفريقى الخالص مش بيصاب بهذا المرض ..