قصة البشرية " التحولات النوعية " / الحلقة 11 .

لغاية 5 مليون سنة الصحراء الكبرى كانت بحر ولما جف بقت فيه ترسبات الملح بكميات كبيرة , ومن هنا اشتغلت قبائل الطوارق فى عملية الترانسفير بين الشمال وبين ممالك جنوب الصحراء كمملكة مالى , والملح كان له أهمية كبيرة فى حفظ الطعام لأنه بيمتص الماء وبيمنع تكاثر البكتيريا وممكن يحفظ الطعام بدون ما يفسد لمدة سنة , لدرجة ان الطوارق كان بيستبدلوه فى مالى بوزنه دهب ..

اشتغال الطوارق بالتجارة كان شبيه بدور المدن الأيطالية ولكن مع اختلاف نوعى كبير , فمدينة مثل البندقية وهى مجموعة جزر متصلة قامت بدور الترانسفير وأحتكرت تجارة التوابل لفترة طويلة قبل ما تدخل البرتغال واسبانيا على خط المنافسة وكانت علاقات البندقية بمصر المملوكية قوية جدا وساهمت البندقية فى ايقاف حملة صليبية متأخرة ضد مصر المملوكية .

لكن دور البندقية والمدن الأيطالية كان مختلف نوعيا لأنه وفر الاساس لنشأة برجوازية مالية - تجارية عملت اتحادات فيما بينها وظهرت فكرة البنوك وبدأت نواة البرجوازية الأوربية فى ايطاليا تمول الحركة الانسانية وساهمت بدور كبير فى انتشار افكار عصر النهضة ..

لكن اللى مثل نقطة تحول تاريخية كان اختراع الة الطباعة سنة 1436 على أيد الألمانى يوهانز جوتنبرج , واللى سهلت عملية نشر المعرفة بسرعة كبيرة وتم طبع ملايين الكتب بعد ما كان طباعة نسخة واحدة من الأنجيل بتاخد 3 سنين ..

انتشار المعرفة وأفكار عصر النهضة كان مرتبط بصعود البرجوازية اللى نمت داخل المجتمع الأقطاعى وبفعل تناقضاته وكان للمدن الأيطالية الدور الريادى فى ذلك وبعدها بتحصل البرجوازية على حقوقها فى بريطانيا وبتشكل اتحاد جمركى كبير بيكون اساس الوحدة الالمانية فيما بعد , ثم بتسجل أهم لحظة فى تاريخها مع الثورة الفرنسية وأعلان الجمهورية ومبادىء حقوق الانسان وهو فى نفس الوقت اعلان سقوط تحالف الاقطاع الكنيسة لتدخل اوربا عصر الدول القومية البرجوازية ويتغير شكل التاريخ ..