على فكرة انا متوقع حرب مش مجرد تهديدات لكن هتبقى فى نطاق اقليمى
ملهاش حل الا حرب وللاسف سوريا هتنزل الارض وترجع للعصر الحجرى
الحرب اقليمية , ايران وحزب الله هيضربوا اسرائيل بالصواريخ واسرائيل هتهاجم ايران وسوريا ولبنان بالطيران , التناقضات قوية فى المنطقة لكن القوى الدولية مش هتتصارع بشكل مباشر ولا التناقضات بينها وبين بعضها فى المنطقة
توصل لدرجة الحرب , لكن اساسا الاطراف الاقليمية نفسها عندها اجندتها الخاصة
يعنى الدولة فى سوريا حاسة بخطر على وجودها اسرائيل كمان من ناحية تانية
قلقانه ان الدولة فى سوريا تنتصر فتقوم تتماسك وترجع اقوى مع شعبية انتصار
المشكلة مع ايران والتوتر مع حزب الله , لان امكانيات الاختراق فى حزب الله ولبنان مبقتش قد كده , حاولوا بالتفجيرات الاخيرة فى الضاحية الجنوبية يحولوها حرب اهلية لكن حسن نصر الله مسك العصاية من النص وبالتالى مفيش الا سوريا اللى اترمت الكورة فى ملعبها وكان السناريو ده هيتكرر مع مصر
لكن للاسف الدولة المصرية هتبقى محايدة ويمكن الدبلوماسية تقوم بدور قذر
لكن الجيش هيقف مع الجيش السورى فى السر لكن الدولة السورية هتتعرض لضربات عنيقه خاصة ان الجيش مشتبك فعليا ..
واضح كمان ان اسرائيل بتجهز لعمليات عسكرية كبيرة وده كان رصد من حزب الله
بس انا ارجح ضربات جوية وتهديد بغزو لبنان وضرب المفاعلات الايرانية
هيكون الرد " لبنانى - ايرانى " بالاساس مع مشاركة ما من الجيش السورى
القوى الدولية هتبقى حذرة عشان الاشتباك ميجرش رجليها لمواجهات مباشرة
روسيا والصين هيمنعوا الاسطول الامريكى والناتو من التدخل المباشر لكن الامريكان هيقولك اسرائيل اللى بتحارب ولو رجعنا للتاريخ هنلاقى ايام الحرب الباردة السوفيت كانوا موجودين وكانوا بيتدخلوا لكن فى حدود لكن كانوا بيسيبوا الدول الاقلمية تتخانق , يعنى مواجهات غير مباشرة بينهم وبين الامريكان وده اللى بتعمله روسيا حاليا , يعنى عودة لمناخ الحرب الباردة بشكل ما ..
امريكا بتتحرك بنفس الاسلوب خاصة انها متقدرش على عمليات عسكرية كبيرة
وادارة اوباما رايحة فى داهية ....
يبقى الوضع كالأتى , روسيا حليفتها سوريا فى المنطقة وامريكا حليفتها اسرائيل
والاتنين ليهم مصالح متعارضه لكن متوصلش لدرجة الخناقه وبالتالى هم مش هيعلنوا حرب عالمية بينهم عشان المنطقة لكن امريكا تخلى اسرائيل تتحرك
وروسيا تخلى ايران تتحرك , حزب الله كمان يتحرك ممكن ايضا تمد سوريا بسلاح للصمود لكن مشكلة الكارت الروسى انه حليفه وهو سوريا ارضه نفسها هى الملعب لكن عنده اورق اخرى ممكن يضغط بيها , الامريكان عاملين زى البلطجى اللى فقد كل حاجة فبيلوش فهم هيزقوا اسرائيل للحرب ...
انا بتوقع نتايج الحرب انه سوريا ولبنان للاسف هيتبهدلوا تماما لكن مش هيقع النظام , بس ممكن ده يكون فى صالح المتمردين على الارض ويبقى فيه تسويات على شروط جديدة منها رحيل بشار
لان الوضع الحالى اصلا بيخلى النظام يقول اتفاوض معاك ليه وانا منتصر
الامريكان مضايقين اوى من الحوار ده ومن روسيا
روسيا كانت اتفقت مع امريكا على التسويات دى لكن الروس دعموا النظام جامد
فاوراق اللعبة اتغيرت لان النظام حقق انتصارات على الارض بينما الدبلوماسية الروسية والضغط الروسى - الصينى المشترك عمل شبه حظر على دعم السلاح اللى رايح للمتمردين , وبالتالى الامريكان اضحك عليهم هنا بشكل واضح ..
معرفش التسويه النهائية هتبقى ازاى ولا الدولة هتكمل ازاى لكن روسيا مش هتطلع من سوريا والبعث مش هيمشى , ممكن بشار يمشى
هى المسألة هتبقى سيب وانا اسيب لان من ناحية تانية اسرائيل هتتبهدل
ومضيق هرمز هيتقفل والدنيا هتبوظ فعليا ....
وليد سامى
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.