قصة البشرية " التحولات النوعية " / الحلقة 10 .

تواصل البشر من خلال الطرق الرومانية وطريق الحرير واتساع الامبراطوريات وتأمينها للمواصلات كان له عوامل سلبية أخرى ومنها انتشار الامراض , فالطاعون الأسود اللى اجتاح أوربا فى الفترة ما بين 1347 - 1352 كان اصله بكتيريا بتصيب القوارض الأرضية , زى الفيران السوداء واللى كان موطنها الأصلى فى اسيا ولكنها انتقلت عن طريق التجارة الى أوربا وحملت معاها المرض واللى كان تأثيره على أوربا شديد للغاية ..

الطاعون استغرق عشر سنوات ليمر من اسيا الى أوربا لكنه انتشر سريعا فى أوربا وده بسبب طبيعة جغرافية القارة لانها ضيقة المساحة وبالتالى الكثافة السكانية عالية , وبجهل تام بالمرض وبأسبابه مات ثلث سكان القارة تقريبا وتصور الناس ان دى نهاية العالم ..

وفى محاولات عديدة لمواجهة المرض بالخرافة او بالمباركات الدينية كانت الازمة بتزداد سوءاً , وفى المانيا تم تحميل اليهود المسئولية واتهامهم بأنهم قاموا بتسميم الأنهار لكن لم يتوقف المرض اللى أدى فى النهاية الى موت 50 مليون شخص فى خمسين سنة ..

لم ينتقل المرض لأفريقيا لأن الصحراء الكبرى كانت حاجز طبيعى دون انتشار المرض ..

قصة البشرية " التحولات النوعية " / الحلقة 9 .

مع بدايات القرن الثالث عشر بدأت جماعات المغول الموحدة تحت قيادة جينكيز خان تجتاح أراضى الأمبراطورية الصينية ووسط أسيا , وكانت شخصية تيموجين أو جينكيز خان استثنائية بكل المقاييس وهو لا يعتبر مجرد فاتح عسكرى وانما أيضا أول مشرع وواضع قانون للقبائل المغولية البربرية ..

القبائل دى كانت تعيش على الرعى فى برارى وسط اسيا , ولكن فى الفترة دى حصل تغيرات مناخية نتيجة زيادة فى النشاط الشمسى مما أثر على منطقة وسط أسيا وحولها لصحراء قاحلة , فاندفعت القبائل المغولية تجاه الصين بثرواتها المتعددة والصراع ده تاريخيا متكرر زى ما بيقول الدكتور جمال حمدان , وهو صراع الرمل والطين أو هجوم البدو الرحل على الحضارات الزراعية المستقرة ..

وبالتالى فالعوامل الموضوعية المادية لظهور الامبراطورية المغولية وهى أكبر أمبراطورية عرفها التاريخ كان ليها دور حاسم ورئيسى فى ظهور التوجه السياسى والعسكرى للغزو

بالاضافة لذلك كان المحاربين أشداء لطبيعة الحياة القاسية , ويضاف الى ذلك انه البيئة وفرت لهم سلاح متميز نوعيا كان موجود بوفرة وهو الحصان , واللى تم ترويضه وكان الطفل بيبدأ ركوب الحصان من سن سبع سنوات ..

الحصان بيتميز بخفة الحركة وكان لكل فارس من المغول أربعة من الخيول , ووصل عدد الخياله فى الجيوش المغولية الى 50 الف فارس وده سهل سرعة حركتهم ومفاجئة العدو ده بالاضافة الى مفاجئة المشاه والتفوق عليهم بخفة حركة الفارس مع الحصان , ويعتبر الجيش المغولى أول جيش يطبق استراتيجية الـ Blitzkrieg أو الحرب الخاطفة " حرب البرق " واللى طبقها الألمان فى الحرب العالمية الثانية ضد الحلفاء فى بداية الحرب وحققوا الانتصارات الاولى بسببها , وأيضا كانت استراتيجية اسرائيل فى حرب 67 ضد الجيوش العربية

تسببت حروب جينكيز خان فى مقتل 40 مليون انسان وده قد يقترب من ربع سكان الأرض وقتها واشتهرت جيوشه بالوحشية والذبح وكانوا بيعملوا أكوام من الجماجم والعظام البشرية لأرهاب أعدائهم ..

ومعروف عنه انه اغتصب الاف النساء لدرجة انه يقال ان واحد من كل 200 شخص فى وسط وشرق اسيا يحمل جينات هذا الرجل ..

هنا بيظهر التاريخ البشرى فى صورة مخيفة فما بين الحروب فى اماكن متفرقة فى العالم وما بين الأمراض القاتله المتمثلة فى الطاعون الشهير فى منتصف القرن الرابع عشر بيظهر العالم قبل الحداثة بشكل قبيح جدا , وبعيدا عن روتين الحياة اليومية اللى بنعيشها النهارده واللى تعتبر مستقرة الى حد بعيد .. فحياة البشر سابقا كانت أكثر شقاءاً بكل تأكيد ..

قصة البشرية " التحولات النوعية " / الحلقة 8 .

الدول طبيعى بتحمى اسرار الصناعة , كانت الصين بتصنع الحرير وكان الرومان بيصرفوا مصاريف باهظة على الكماليات وبيشتروا الحرير من خلال وسطاء وكانت طرق التجارة سبب رئيسى للصراع من بداية الأمبراطورية الأولى فى التاريخ أيام الملك تحوتمس التالت , وفضلت حتى ظهور البرجوازية التجارية اللى كانت بتحتكر استيراد التوابل من الشرق , ولعب طريق الحرير دور كبير جدا فى اتصال الحضارات والشعوب وانتشار الافكار والديانات المختلفة .

المهم انه الصينيين أخفوا سر صناعة الحرير لقرون طويلة لدرجة ان الرومان تصوروا انه الحرير هو نبات بينمو على الشجر , لحد ما اكتشفوا فيما بعد دور دودة القز فى انتاجه ..

المهم أنه التواصل مع الشرق هيفضل فى اطار السياسة الرومانية منضبط الى حد بعيد حتى تتطور البرجوازية داخل المجتمع الأقطاعى الأوربى اللى قام اساساً على أنقاض السلطة المركزية لـ روما فى أوربا , بعدها هتبدأ البرجوازية التجارية فى الاحتكاك بدول الشرق " الهند والصين " ويبدأ الدور الأستعمارى يتبلور ويتحول نوعياً من الصراع بين القوميات البرجوازية فى أوربا على احتكار استيراد السلع الى مرحلة احتكار تصدير السلع وضرورة فتح أسواق جديدة بعد الثورة الصناعية ودى المرحلة اللى هتشهد فيها البشرية أكبر عملية استعمار فى تاريخها , بحيث تصبح الجزر البريطانية امبراطورية لا تغيب عنها الشمس .

قصة البشرية " التحولات النوعية " / الحلقة 7 .

استكمالا لأمبراطوريات عصر الحديد " توافر الحديد أساسى لقيام الامبراطورية " كانت الامبراطورية الرومانية نموذج مختلف فى التاريخ , وبعد ما تخلصت من منافسة قرطاج على البحر المتوسط بعد هزيمة هانيبال فى معركة زاما 202 ق.م بدأت تفرض نفوذها بشكل كامل وبدأت عملية التوسع العسكرى تضاعف مساحة الدول الصاعدة اللى كانت بتنفق 50% من موازنتها على الانفاق العسكرى ..

مدينة روما وصل عدد سكانها فى القرن التانى بعد الميلاد الى مليون نسمة ودى كثافة سكانية عالية جدا تقارن بالكثافة السكانية لمدينة زى مانهاتن , بالاضافة لذلك ف روما تعتبر أول مدينة ضخمة فى التاريخ Mega City ...

فى نفس الوقت كانت الامبراطورية الصينية فى الشرق بتوسع حدودها وبترسم حدود الصين الحالية , وكان المميز فى كلا الامبراطوريتين هو ما يسمى الانتاج الضخم بعدما اكتشف الصينيون طريقة لصب الحديد فى قوالب وانتاج كميات كبيرة من الاسلحة وده اللى بيسموه فترة الـ Mass Production واللى على اساسها استمرت الامبراطوريات دى لفترة طويلة من الزمن وصلت لخمس قرون فى حالة الامبراطورية الرومانية وأكتر من 2000 سنة فى حالة الامبراطورية الصينية اللى انشأها تشين شي هوانج سنة 221 ق.م واستمرت حتى ثورة شينهاى فى 1912 م ..

اشتهرت روما بالمشاريع العملاقة ومنها قناة كلاوديوس لامداد المدينة بالمياه , ويقال ان تكلفه هذة القناة اليوم تساوى 2 مليار دولار , وكان الرومان أول من استخدم الاسمنت فى البناء وطبعا ده راجع لعوامل البيئة لأنه بييجى من الرماد البركانى و روما محاطه بخمسين جبل بركانى ..

لكن أهم مشاريع الرومان كانت الطرق الرومانية ودى كان بيقوم بيها الجنود أيضا لأن كتير منهم كانوا مهندسين , شبكة الطرق الرومانية امتدت لمسافة ربع مليون ميل من الطرق ودى تلف الكرة الارضية عشر مرات , ربطوا من خلالها أغلب المدن الكبيرة فى أوربا واللى انشأت على الطراز الرومانى زى لندن وبرشلونة وباريس ..

سيطرت روما على الجزر البريطانية اللى كان وقتها بيسكنها الكلتيين Celts طمعا فى مواردها من الحديد اللازم لصناعة الاسلحة والادوات المختلفة وكذلك النحاس والقصدير بالاضافة للفضة لتمويل مشاريع التوسع العسكرى ..

الطرق الرومانية فيما بعد هتكون الاساس اللى من خلاله هتنتشر الأفكار بين أرجاء العالم الرومانى وبالطبع انتشار المسيحية خاصة بين الفقراء والمهمشين والعبيد والنساء فكان عدد العبيد فى الامبراطورية 8 مليون من أصل 50 - 60 مليون نسمة كتعداد لسكان الامبراطورية فى أقصى اتساع وازدهار لها , ووصلت عدد المسيحيين لحد عصر قسطنطين الى 6 مليون الى أن حدث التحول الجذرى حينما أصبحت المسيحية دين الدولة وتحول العالم الغربى كله الى المسيحية , بالاضافة للعناصر الشمالية North men أو الفايكنج ويعرفون أيضا بالجيرمان أو قبائل التيوتون وهم عناصر وثنية أرتبطت بعبادة أودين وكانوا بيعملوا بالزراعة لكن فيما بعد هيشكلوا النواة الجديدة لسكان أوربا وهيطيحوا بسلطة روما ليبدأ معهم عصر الاقطاع الأوربى والعصور المظلمة , لكنهم هيدخلوا المسيحية ويشاركوا فى الحروب الصليبية وأسسوا للممالك الأوربية الحديثة " الفرنجة فى فرنسا - الانجلوسكسون فى بريطانيا - الفايكنج فى روسيا - الجيرمان فى المانيا " ...

قصة البشرية " التحولات النوعية " / الحلقة 6 .

الفينيقيون انشأوا حضارة تجارية فى البحر المتوسط من خلال مدن ومراكز فى شرق وغرب المتوسط ومع بداية الألف الأولى قبل الميلاد كانوا اصبحوا مسيطرين على تجارة البحر واستعان بيهم الفرعون نخاو التانى فى رحلة استكشافية حول أفريقيا وفيه دلائل بتقول انهم وصلوا للأمريكتين قبل الكشوف الجغرافية فى القرن الخامس عشر الميلادى ..

فى تسجيلات رحلة لمستكشفين فينيقيين من قرطاج حول الساحل الغربى لأفريقيا رصدوا بركان جبل كميرون ووصفوه , وذكروا انه النار والدخان الخارج منه وصل للنجوم وغطى السماء

أيضا وصلوا للجابون وفى غابات الجابون رصدوا ما اطلقوه عليه بشر يعيشون حياة بربرية واطلقوا عليهم اسم الغوريلا , وهؤلاء البشر لم يكونوا غير الغوريلا من القردة العليا ...

المراكز الفينيقية فى المتوسط هتواصل دورها لحد المنافسة مع أهم امبراطوريات عصر الحديد واللى كادت تحسم لصالح قرطاج لولا تعرض هانيبال " حنبعل " للهزيمة بسبب خيانة الطبقة الحاكمة فى قرطاج وتراجعها عن دعم الحملة العسكرية داخل الأراضى الايطالية والتى كادت تقضى على روما , بعدها هزم هانيبال فى معركة زاما سنة 202 ق . م فى مواجهة القوات الرومانية بقيادة سكيبيو اللى أطلقوا عليه سكيبيو الأفريقى لأنه أنتصر فى أفريقيا وتم سحق قرطاج تماما لتكون هزيمة هانيبال تحول نوعى فى التاريخ ينتقل معه مركز الأمبراطورية وقيادة العالم الى الغرب حتى صعود الامبراطورية العربية الاسلامية ..