ازاى ؟ الدليل العصرى للانسان المصرى .

ازاى السعودية بتدعم 30 يونيو وفى نفس الوقت بتمول سد النهضة ! ازاى ؟ ...

كل الدول ليها مصالح , سيبك من الكلام الحلو بتاع العروبة والأخوة والاسلام ورابطة الدين , مصلحة ال سعود هى بقاء العرش السعودى , لما دخلوا فى صراع مع عبد الناصر مش لانهم بيكرهوه بشكل شخصى , ولكن لان مشروعه كان بيهدد المملكة بقيام جمهورية فى اليمن ..
كان لابد من مواجهة عبد الناصر على أى أرضية , يقولوا عليه كافر وملحد وشيوعى , ويتحالفوا مع امريكا او حتى اسرائيل لكن فى حدود ..
ايه هى الحدود دى ؟!

انه ميتمش تدمير مصر مثلا , او احتلالها , ده مش مطلوب سعودياً , لكن المطلوب ان تتراجع مصر وراء قناة السويس , مناخير عبد الناصر متطلعش بره قناة السويس وده الوضع اللى استمر رغم العبور فى 1973 ..

وبالتالى مصر هتفضل دولة طيبة بالنسبة للسعودية طول ما هى مستخبية ورا حدودها ومش بتعمل مشاكل وده من ناحية ..

من ناحية تانية تنظيم الأخوان كان بيمثل خطر على العرش السعودى فى اطار مشروع بتقوده قطر , مكانة السعودية فى الخليج والعرش نفسه فى خطر , مين يلعب دور الوكيل الأمبريالى فى المنطقة وبأى كيفية ؟
الاخوان قبل كده فى التسعينات قاموا بمحاولة للانقلاب على العرش رغم كل دعم ال سعود لهم ايام الخلافات مع عبد الناصر , وبالتالى نظام الأخوان بسيطرته على دولة زى مصر كان هيعمل مشاكل كبيرة لال سعود , صحيح ان الاخوان كانوا هيدمروا الدولة تماما فى غضون عشر سنين والبلد كانت هتدخل فى حرب أهلية , لكن ال سعود مش مهم عندهم مصر , المهم انه الدولة المصرية متعملش مشاكل , ده غير انه على المدى البعيد انهيار دولة زى مصر هيدمر المنطقة كلها تماما وهتبقى حالة فوضى لا مثيل لها , كل عزبة هترفع علم تحت راية دين او قومية ..

طيب هل احنا لينا مصلحة مع السعودية ؟
الحقيقة مفيش حاجة اسمها عداء تاريخى , يعنى احنا مش بنكره دولة معينة او شعب معين , ومينفعش يكون فيه خلاف مستمر عبر التاريخ الا لو كانت دواعى وجود الخلاف مستمرة , وبالتالى النظام الملكى السعودى ومصالحه بتتعارض ومازالت تتعارض مع مصالح مصر , مصر محتاجة تتحرك خارج حدودها , تأمن منابع النيل فى افريقيا والكلام ده بيتقال من سنين وادينا شوفنا اللى بيحصل , كمان مصر محتاجة تتحرك فى دايرة امنها القومى العربى , يعنى سوريا , يعنى العراق , يعنى لبنان , ويعنى ليبيا وتونس واليمن , وكل ده هيحول مصر لدولة ليها نفوذ حقيقى , وهتصطدم بأل سعود وبكل ممالك الخليج للاسف ..

الجمهورية المصرية لو هتقوم من ركودها , لازم تعمل تصنيع وعشان نعمل تصنيع هندخل فى معركة استقلال اقتصادى لا تنفصل عن معركة الاستقلال السياسى , يعنى مواجهة مع الامريكان واسرائيل وحلف الناتو وتركيا , الكل هيعلن علينا الحرب وفى صفهم هيكون أل سعود ..

وليد سامى واصل

ثقافة العنف فى المجتمع الأمريكى

فى الولايات المتحدة قوانين فى ولايات عديدة بتسمح للأفراد باستعمال السلاح لأغراض الحماية الشخصية , مجرد اختبارات عادية تثبت ان الشخص مش مضطرب نفسيا ويبقى من حقه امتلاك سلاح شخصى للدفاع عن النفس , من أكتر الولايات اللى فيها السلاح ومنتشر بدرجة كبيرة بين المواطنين ولاية تكساس , تقريبا كل بنى أدم فى الولاية معاه مسدس او بندقية , وحتى الأطفال من سن 5 سنوات بيتم تدريبهم على الرماية بطلقات حية , وفيه اسلحة مخصصة للاطفال وللبنات , يعنى تلاقى البندقية لونها وردى عشان تنفع تبقى بندقية بناتى !!
المشكلة انه المجتمع الأمريكى واقع فريسة فى ايد الشركات الأمنية وتجار السلاح , عندنا الأعلان اللى انتوا شايفينه بيقول ببساطة ..
shoot or call 911 !! يعنى يا تلحق نفسك وتستخدم السلاح يا اما تستنى الشرطة تيجى تنقذك , المشكلة ان الارقام بتدى مؤشرات خطيرة , فمثلا منذ ولاية أوباما وحتى الأن هناك 48 ألف امريكى كانوا ضحايا لحوادث اطلاق النار سواء بالاصابه أو بفقدان حياتهم تماما , فى سنة 2010 لوحدها فقد اكتر من 1500 شخص حياتهم فى حوادث اطلاق نار ومنهم ناس بريئة تماما لم يقوموا بأى أعمال سرقة أو عنف .
النتيجة السلبية ايضا لتدريب الأطفال على حمل السلاح هو الحوادث المتكررة والشهيرة للعنف داخل المدارس وحتى الابتدائية منها , فهناك اكتر من حادثة عن قيام طفل بقتل عدد من اصدقائه باستخدام سلاح نارى , والحكومة الفيدرالية لا تستطيع ان تمرر قانون يحظر استخدام الاسلحة دى وده لانه فيه معارضة من الكونجرس , وده طبعا راجع لجماعات الضغط المالى اللى بتعمل لحساب شركات السلاح , ده غير كم الدعايا اللى بتلعب على خوف الامريكان وخوف أى انسان من التعرض للخطر .
الخلاصة ان المجتمع الأمريكى مش بس مشغول بحرب خارجية يمكن ميعرفش عنها الا معلومات محدودة , ولكن أيضا هناك حرب داخلية عشان محدش يسأل ليه فائض الموازنه ميتخصمش من المجال العسكرى ويتحول للخدمات الاجتماعية خاصة من بعد سقوط الاتحاد السوفيتى وانتهاء الحرب الباردة ..
الملاحظة الاخيرة انه ولاية زى كاليفورنيا فيها قوانين بتحظر استخدام السلاح ومن هنا قلت نسبة الجرائم المتعلقة باطلاق النار بنسبة 40% وبرغم ده مازال هناك الكثيرين ممن سيفقدون حياتهم نتيجة العنف داخل المجتمع الامريكى ..

 وليد سامى واصل

بخصوص الأزمة الأوكرانية مرة أخرى

فيه مشكلة كبيرة بالنسبة لأوربا بشكل عام ولألمانيا بشكل خاص من حيث تعارض مصالح واضح مع السياسة الأمريكية , الحقيقة ده مؤشر واضح ان أوربا نفسها عندها أزمة فى استقلال قرارها السياسى , الغاز الروسى موجود فى كل أوربا وعملية ايجاد بديل عن طريق الغاز القطرى مرورا عبر الأراضى السورية ثم التركية تعرضت لفشل كبير بعد صمود الجيش السورى فى وجه الجماعات الأرهابية المقاتلة على الأرض , والحقيقة ان انتصارات الجيش العربى السورى مش مجرد انتصارات عسكرية ولكنها بالنسبة لروسيا خاصة انتصار لحليف بياخد مواقف متعاونة مع روسيا بشكل كبير , وده حال حلفاء روسيا بشكل عام زى ايران مثلا , فمثلا بعد رفع العقوبات الأوربية عن ايران فيما يخص مجال المنتجات البترولية , اعلنت ايران انها مستمرة فى حظر تصدير البترول لعديد من دول الاتحاد الاوربى , طبعا الأوربيين كانوا بيحاولوا يوجدوا مخرج عشان يحلوا أزمة الطاقة ويلاقوا منفذ بعيد عن النفوذ الروسى , وبالتالى يشتروا البترول والغاز الايرانى باسعار قليلة , لكن ايران رفضت , وايران هنا بتدرك طبيعة العالم الجديدة اللى روسيا بتتزعم هذا التصور عن عالم متعدد القوى والأقطاب , وبالتالى البترول هيلاقى اماكن عديدة لتصريفه , زى الصين وزى دول البريكس وكلها دول صناعية وفى حاجة للطاقة , فى نفس الأطار اعلنت روسيا ان العقوبات الأمريكية على ايران لا تلزمها ....

ده معناه ان العقوبات الامريكية والاوربية لا تتعدى كونها عقوبات على شخصيات ودبلوماسيين روس , لكن امريكا فى اطار المواجهة مش معرضة لضغوط مباشرة من روسيا عكس أوربا , وبرغم ده الولايات المتحدة قد تتعرض لاضرار كبيرة اذا استمرت فى تصعيد العقوبات ووسعت مجالها لتشمل عقوبات على كيانات ومصالح اقتصادية روسية , لان ده هيفتح مجال جديد لحرب باردة بشكل واضح ومباشر وهناك هتتحرك روسيا لتدعيم شراكتها بالصين بشكل كامل ومع دول البريكس وفى دايرة تحالفاتها اللى قدرت تصمد فى الشرق الأوسط وتقدر تفتح مجالات لتحالفات جديدة , ده غير ان المنظومة المالية الأمريكية هتتعرض لضربة عنيفه اذا تحولت عدد من الدول الكبرى الى نظام مالى جديد يستغنى عن التعامل بالدولار وكان فيه اخبار انه روسيا وعدد من الدول المجاورة بيتكلموا فى فكرة التعامل التجارى بالعملات المحلية اذا ما تم فرض عقوبات اقتصادية أمريكية ..
أما أوربا والمانيا بشكل محدد , فمسألة انقطاع الغاز الروسى هتعمل كارثة كبيرة وهتوقف الحياة تماما , وروسيا ايضا هتتضرر من توقف تصدير الغاز , وبالتالى أوربا عليها أن تختار بين مصلحتها المباشرة وبين الشراكة مع الولايات المتحدة اللى اصبحت بتمثل عبىء على مصالح القارة العجوز , وألمانيا بشكل محدد قد تضطر لحسم موقفها من الاتحاد الأوربى نفسه اذا وصلت الأمور لحد الاختيار بين الاتحاد الاوربى والشراكة مع روسيا.
وهنا أوكرانيا نفسها مش هتقدر تتجاوز الأزمة لانها متقدرش تعيش بعيدا عن الغاز الروسى اللى كان بيروح لأوكرانيا باسعار رخيصة وبتسيهلات كبيرة فى الدفع , وبالتالى كل اللى تقدر تعمله السلطات الأوكرانية الحالية انها تاخد قروض مشروطة من الأوربيين والامريكان والمؤسسات الدولية زى صندوق النقد الدولى , وده هيعرض البلد للافلاس كعادة القروض المقدمة من تلك المؤسسات وشروطها الصعبة , من ناحية تانية مازال الجانب السكانى وانتماء عدد كبير من السكان فى أوكرانيا الى روسيا باعتبار ان كييف نفسها فى العصور الوسطى كانت هى مركز الثقافة الروسية , هيعمل مشاكل زى ما احنا متابعين فى جنوب شرق البلاد , وهنا الوضع قد يتحول لحرب أهلية خاصة بعد رصد عناصر من اجهزة وشركات أمنية " أمريكية - اسرائيلية - انجليزية " فى أوكرانيا حسب تقرير نشرته روسيا اليوم مؤخراً ..

وليد سامى واصل

قــصـة الـحـضـارة ..

فى مقدمة فجر الضمير لـ جيمس هنرى برستد , الراجل بيقول انه نقدر نمايز بين مرحلتين فى تاريخ البشرية الطويل , المرحلة الأولى مرتبطة بتصنيع السلاح ودى عمرها مليون سنة من أول البلطه لغاية القنابل النووية ودى لم تتوقف أبدا ويعتبر الانسان أول كائن بيصنع سلاح وبيهاجم بيه اعداءه حتى من البشر الأخرين , بينما المرحلة التانية هى اللى بيسميها فجر الضمير او ظهور القيم والأخلاق واللى نشأت معاها المجتمعات واستقرت الشعوب وأنتجت الحضارة ودى عمرها 5 الاف سنة بس , وبتحليل مادى واضح بيقول انه ظهور القيم كان مرتبط بتجربة الانسان وتراكم خبراته وجدل العلاقات البشرية مع بعضها ومع البيئة قبل ما تكون وحى منزل من السماء ..
لكن المهم ازاى كلام الراجل تحول لفيلم هندى فى خيالى , انا تخيلت البشر على مدار مليون سنة صراع , اتنين شافوا بعض واحد منهم فوق جبل والتانى تحت , مع اصوات مش مفهومة بس ممكن نترجمها فى الأتى /
( هع بخ عو هطلع تيت ... ) وبعدين صوت طاخ طيخ , وبقى عندنا قتيل هشمت رأسه وممكن التانى ياكله على العشا مفيش أزمة , وهكذا بيتكرر السينايو لغاية لما جه يوم من الأيام لأحفاد الأتنين اللى اتعاركوا مع بعض بعد مليون الا 5 الاف سنة , شافوا بعض وبالفطرة برده ( هع بخ عو هطلع تيت ... )
ولما قربوا من بعض فجأة فيه شىء ما وقفهم - ربما الأرهاق - وكل واحد فيهم سأل التانى وقاله لحظة ! احنا بنعمل كده ليه ؟! ليه لازم نقتل بعض ! انا اصلا مش جعان دلوقتى ..
اسم الكريم ايه ؟ اسمى AO , اهاا اهلا وسهلا , أخوك فى الله محمود ..
محمود !!؟ غريب اسمك ! يعنى AO ده اللى اسم !! , المهم انت عامل ايه ؟
انا تمام والله بس العيشه صعبة يا صاحبى !
طب بقولك ايه ما تيجى نتحالف وانا وأنت على الحيوانات والأكل بالنص ؟
اشطه يا مان , انا موافق , وبعدين قابلوا مزتين وتكاثروا على العهد اللى بينهم
ودى باختصار قصة الحضارة , وكل الأعتذار لـ ويل ديورانت .


وليد سامى واصل

عـــفــــاريــت الــســكــر ...

                                          

كل يوم أصحى ألاقى حواديت عن العفاريت !! ماما بتحاول تقنع أختى دايما انه فيه عفاريت وتحكى قصص عن العفريت اللى سلم على فلان الفلانى وبعدين اختفى !! والعفريته اللى لقيتها جارتهم بالليل قاعدة فى المطبخ ورجليها واصله لحد الصالة وبتاكل حلة المحشى , وأختى تسمع من حد قصة عن عفريت بهدله فى المستشفى لما كان قاعد جمب واحد صحبه مريض ولما كل الناس مشت طلعله العفريت ووقعه على الأرض وقعد يصرخ , العفريت كان طويل وعينه حمره ولابس جلابيه قصيرة !!

المهم تحاول تفهم ايه الهدف من كل التخويف ده متعرفش ! تحس انهم بيلعبوا ..
المشكلة أنه أغلب قصص العفاريت ليها سمات واضحة ..
وهى أولا انه القصة دايما بتحصل لشخص واحد بس مش لاتنين ! دايما واحد لوحده , وده يعنى مش من الرجوله حتى ! طيب عفاريت ازاى !!
ثانيا القصص دى بتتحكى عن اماكن ضلمه او خلاء او زمان قبل السد العالى !
المشكلة ان لكل مجتمع عفاريته , مخاوفه , الشعوب القديمة رسمت مخاوفها على جدران المعابد والكهوف فى أشكال معينة لكن الملاحظ انها لم تتجاوز صور البيئة المحيطة فنلاقى الشيطان شبه الانسان بس له ديل ورجل معزه ! , المهم انه تركيب من صور البيئة المحيطة , وكل مخاوفنا اللى بنشوفها فى الأحلام هنلاقيها مبتقدرش تتجاوز صور البيئة المحيطة بدليل ان العفريت اللى اتحكى قصته لأختى امبارح كان له ايد ورجلين ولابس جلابيه !! ..
لكن المجتمعات فى أوربا والغرب تجاوزت التصورات البدائية , وبقى لهم عفاريت مختلفين , هنلاقى هناك الخوف من الكائنات الفضائية وظاهرة الـ Ufos وناس تتكلم عن مشاهدات لأطباق طائرة وان الحكومة الامريكية عندها منطقة اسمها المنطقة 51 ودى فيها كائنات فضائية او طبق طاير وانهم كاتمين الأسرار من الستينات !! وأخيرا طلع وزير الدفاع الكندى السابق بيقولك انه حكومة الولايات المتحدة بتتواصل مع الكائنات الفضائية وان الناس دى ليها تعليق على سلوك أهل الأرض واننا بندمر البيئة والكوكب ! طب وهم مال أهلهم ! ما الكواكب كتير وكل واحد يخليه فى كوكبه ! ما علينا ..
نشوف برده الصور اللى اترسمت للكائنات الفضائية هنلاقيها كلها صور من البيئة المحيطة لم تتجاوزها , مثلا يطلع الأفاتار لونه ازرق وطويل شوية وله ديل بس انسان بشكل ما , تم تحوير شكله لكنه انسان , حتى كل الاشكال اللى ممكن نوصفها بالعجيبه هنلاقيها يا اما بتمشى على طرفين او أربع اطراف ونفس الفكرة بوجود عيون وايد ورجل وله صوت وطبعا لغة مختلفة ..

انا مش هقول انه مفيش ظواهر تبدو غريبة وملهاش تفسير واضح , بالعكس فيه ظواهر فعلا ملهاش تفسير علمى واضح حتى الأن , لكن ده معناه اننا لم نتوصل لتفسير الظاهرة وده مش مبرر اننا نمشى بمنطق الخرافة , وبعدين انتوا عارفين يعنى ايه خرافة ؟! خرافة ده كان رجل ادعى ان الجن خطفته فترة ولما رجع قعد يحكى حواديت فالناس قالت ذلك حديث خرافة , مين يصدق خرافة !!

وليد سامى واصل

سكيبيو

سكيبيو المعروف بـ سيكيبيو الأفريقى وهو قنصل رومانى وشهرته مرتبطه بانتصاره على هانيبال , الفكرة ان سكيبيو درس خطط هانيبال واستراتيجيته العسكرية واستخدمها ضده وتفادى نقاط القوة اللى عند هانيبال زى الفيلة وأخرجها من المعركة بلا أى اثار مضره بجيشه وباالتالى استطاع تطويق جيش هانيبال فى معركة زاما وقضى عليه وسقطت قرطاج بعدها وانتهى الصراع الطويل بانتصار الامبراطورية الرومانية وبكده قدرت روما تسيطر على المتوسط وتمد نفوذها فى مساحات شاسعة من المعموره , المهم فى الحرب ليس الانتصار فى مائة معركة وانما دراسة الخصم جيداً والتعلم من الأخطاء والانقضاض على استراتيجيته والقضاء عليه وهكذا يتحقق لك النصر ..

وليد سامى واصل

أوكرانيا وصراع القوى الكبرى ..

اللى قرا فى الجغرافيا السياسية فيه مصطلح اسمه المنطقة النواة وده له تفسيرين , احدهم تاريخى والتانى معاصر مرتبط بطبيعة الدول الحديثة ..
التفسير التاريخى مرتبط بمنطقة نمت منها الدولة زى باريس مثلا اللى كانت امارة قوية وقدرت تكون نواة لنمو دولة فرنسا الحالية , وفيه التفسير المعاصر اللى مرتبط بمدينة او موقع جغرافى بقى ليها مميزات اكتسبتها فى العصر الحديث وصارت لها اهمية وبقت العاصمة واحتكرت الثروة واهم المؤسسات وبيتركز فيها أكبر عدد من السكان ..
اللى ميعرفش ان كييف بتمثل الجانب التاريخى من نمو الحضارة الروسية , كييف كانت قلب الثقافة الروسية قبل موسكو , ولكنها سقطت ف العصور الوسطى امام الهجمات التتارية وسيطرت عليها القبيلة الذهبية " القبجاق " وبعدين بدأت موسكو تقوم بالدور التاريخى واصبحت قلب الثقافة الروسية وعاصمة السلاف .
الموضوع فى أوكرانيا مش بالسهولة اللى الكل متخيلينها وبعيدا عن تنظير شباب يسقط يسقط وان اى مظاهرات تبقى ثورة , هسيبكم مع تقدير موقف استراتيجى من الرفيقه وسام واصل للأوضاع فى أوكرانيا ومصير الصراع بين القوى الكبرى ..

- كتبت وسام واصل / "" صراع القوى العظمى مُتجه نحو حسم الأمور لروسيا و حليفها الاقوى اللى هو ( الصين ) ""

معروف ان الميزان التجارى هايكون لصالح الصين بحلول عام 2015 بالنظر لأجمالى حجم الصادرات و الواردات من السلع اللى تخطت حجم التجارة الامريكية بِدءاًُ من عام 2012 و بالنظر للعجز فى الميزان التجارى الامريكى اللى تغلبت عليه الصين برضه بحجم تجارتها هاتصبح اهم شريك تجارى لدول عدة !

ده سبب فى توتر العلاقات الثنائية بين البلدين واتصور ان بعد سنة واحدة الصين هايكون لها مواقف اجرأ ف المشهد السياسى الدولى وردود افعالها على السياسة الخارجية للولايات المتحدة هاتكون اقوى واعنف
روسيا هنا مش بمنأى عن الصراع بطبيعة الحال هى الحليف الأقوى للصين وصاحبة الصدارة بميزان القوى الاقليمية و العالمية

ده كله بيؤدى لمساعى امريكية واضحة لتهديد الأرضية اللى بيقف عليها كلاً من الصين وروسيا بما فى ذلك ضرب الحلفاء الاقليميين
وعشان كده بنشوف امريكا بتلعب للصين بمنطقة زى أقليم التبت و بتحرك معارضة هناك تطالب باستقلال الاقليم عن السيادة الصينية !!!

- الموضوع مُتشعب شوية لكن ضرورى - لفهم و قراءة المشهد الأوكرانى !
ومن هنا اى نظام بيتبنى سياسة معادية للأمبريالية والعولمة والسياسة الخارجية للولايات المتحدة بيكون مُعرض لتحريك ثورات من النوع ده ضده
تظاهرات ظاهريا بتقوم لأسباب متعلقة بتحقيق العدالة الاجتماعية او مكافحة الفساد لكن فى باطنها بتكون انعكاس قوى لصراع القوى العظمى

مِن هنا كان تحريك معارضة مأجورة ضد الرئيس هوجو تشافيز فى 2006 الامر اللى انتهى لأنتصاره على المؤامرة واعادة انتخابه لما له من ظهير شعبى وسياسات اشتراكية جعلته مقبولاً للشعب الفنزويلى منذ عام 1999 !!

اتكرر نفس السيناريو بالشقيقة بالمنطقة العربية لضرب الوجود الروسى بعد تحالفها القوى مع سوريا وايران وتهديد ذلك للوجود الامريكى
واتحركت مظاهرات ضد نظام الاسد واتقدم للمعارضة دعم لوجيستى واااسع النطاق وصل حد التسليح وارسال مجاهدين من مختلف دول العالم للقتال على الساحة السورية و الهدف ف النهاية القضاء على حليف روسيا بالمنطقة و حسم المعركة لصالح حلفاء الامريكان و الأتيان بنظام جديد على هوى الامبريالية يحقق سياستها بالمنطقة

- بالتطرق للمشهد فى أوكرانيا من الواضح ان الضغط على الروس ومحاولة حصر تحالفاتهم خاصة بعد صفقة السلاح المعلن عنها مع مصر بلغت أشدها ..
والامر هنا مش بالانفصال عن الملف السورى ابداً بالعكس الامريكان يبدو وكانهم بيقولوا أما الرئيس بشار أو رئيس اوكرانيا !! -- " حرب كونية "-- وعلى الروس انهم يختاروا
مش هانسيب لكم حلفاء هنا و هناك
بالامس خَطب برنارد ليفى والكل يعلم من هو برنارد ليفى خطبة عصماء بميدان الاستقلال باوكرانيا هتف بختامها يسقط فلاديمير بوتين !!!!!!!!!!!!!!!! افتكر الامر واضح ؟ مش محتاج نسرد دلائل على وساخة المعارضة

للى مايعرفش عن تاريخ مدينة كييف هى كانت عاصمة للسلاف ( الروس ) قبل موسكو وعشان كده أمر ادارة الدفة نحو الامريكان امر مرفوض شعبيا باوكرانيا فيما عدا المعارضة المأجورة المتواجدة بالشارع
الشعب الاوكرانى مش بصدد صراع سياسى او مطلب اجتماعى ما ده انتماء قومى لروسيا باقِ شاء من شاء وابى من أبىَ ؟

حبيبى يلى عمال تشير صور وفيديوهات وفاكر نفسك ثورى بتدعم المقهورين ف العالم دعم شوية مأجورين اقتحموا القصر الرئاسى بأوكرانيا اليوم وصوروا الامر على انه انتصار هائل من قبيل العتة وان دل فانما يدل على انك كل مرة بنتاخد ورا مصنع الكراسى ومبسوط

اخيرا المشهد باوكرانيا لم يبلغ النهاية لسا أشواط كتير هانشوفها الشهور وجايز الأعوام القادمة
وتصريح لافروف الأخير اللى دعى فيه الغرب لتنفيذ التسوية اللى توصلت اليها الحكومة مع المعارضة دليل على ان الروس لسا مارفعوش ايديهم عن فيكتور بانوكوفيتش وعندهم كتير يقدموه لحليفهم الأقليمى القومى

علي اوكرانيا رايحين شهداء بالملايين ...

تحياتِ #